ولله الحمد اتممت الخمس سنوات وتخرجت من الجامعة (كلية الحاسبات وتقنية المعلومات) تجارب كثيرة مريت فيها ايجابية وسلبية ومع كل تجربة اتمنى اني اسجلها وانشرها لكل شخص راح يمر في طريقي, اكتب هذا الموضوع اليوم لعرض اهم التجارب والنصائح لمن سيبدأ المرحلة الجامعية بشكل عام ولمن يحب كليات الحاسب بشكل خاص.
السنة التحضيرية
#مستجدين_الجامعة من جد من جد مثل طلاب اولى ابتدائي هههه الشعب ضايع ولا يدري وين يروح. المشكلة مافي اي احد يرشد الطلاب والمحاضرات مافي اساتذه
— Rayan #Fisher (@R1skNt) September 1, 2012
هذي اول تغريدة كتبتها من الحرم الجامعي, وهي النصيحة الأولى لا تداوم اول يوم -بإستثناء انك ترغب في التعرف على المباني واماكن المحاضرات- لكن ماراح تلقى اي عضو هيئة تدريس ولا راح يكون فيه محاضرات.
كطلاب او على الاقل جميع الزملاء والاصدقاء الي عرفتهم ماكنا نذاكر الا ليلة الاختبار, بشكل عام في الثانوي كنا نكره الدراسة والمذاكرة والجلسة على الكتب وماكنا نفكر في المستقبل كثير وهذا طبيعي لحد ما, ابغى اوصل فكرة للجميع كل هذي الافكار السلبية راح تتغير تلقائيا وراح تكتشف بعد سنتين انك صاير تهتم وتاخذ وقت اكبر على دراستك لا شعورياً وفي نفس الوقت بتحس بندم انك ماسويت كذا من البداية, اضغط نفسك شوي من اول ترم ذاكر على الاقل كل اسبوعين لان معدلك ودرجاتك في السنة التحضيرية هي نفسها الي بتتخرج عليها اذا ثبت على مستواك وهذا شي سيئ, في البداية ارتفاع المعدل شي سهل جداً وفخلي معدلك عالي وزيد مستواك اكثر مع كل سنة وراح تحس بقيمتها في اخر السنوات.
مواد السنة التحضيرية تنقسم مابين مواد علمية ونظرية و منهج الانقليزي الموسع جدا وراح افصلة بالاخير, باتكلم عن المواد المهمة والتي تحدد الكلية الي راح تدخلها.
الرياضيات: المادة رقم 1 وهي نفس منهج الثانوي لكن بالانقليزي, مذاكرتها تعتمد بنسبة 90% على الملخصات والمذاكرة الذاتية, شخصيا سويت استفتاء مع كثير من الزملاء ونتيجتة ان الاستفادة من دكتور المادة قليلة, في مراجعات مهمة يعملها بعض الدكاترة في المادة لا تفوتها مثل ما يعمل الدكتور القدير حمزة ابو جبل قبل كل اختبار يجمع كل طلاب (اي شخص يقدر يحضر) في مبنى معين و يشرح المهم, اعتمد على نفسك في المذاكرة ثم ارجع لمراجعة الدكتور وراح تطلع بدرجة ممتازة.
الاحياء: مادة دسمة ونفس منهج الثانوي وبالانقليزي هذي المادة تحتاج لحفظ كثير لذلك ماتحتاج لاي شخص اخر في الشرح, فقط احفظ المنهج سواء كتاب او سلايدات او ملخصات جاهزة, احفظ كثير تجيب درجة عالية.
الكيمياء و الفيزياء: نفس منهج الثانوي وبالانقليزي بصراحة انا ما احب هالمادتين وكنت حايس وقتها المنهج بشكل عام مو سهل وشرح الدكاترة سيء لذلك تحتاج مذاكرة ذاتية كثير وبالرجوع للملخصات تقدر تجيب درجة حلوة.
الاحصاء: مادة رائعة وسهلة وهي اعتقد نفس الباب السادس في الرياضيات 3 ثانوي المنهج القديم, اذا ماجبت فيها +90 اعرف ان عندك مشكلة 
الانجليزي: ارجع لهذا الموضوع , راح تدرس 4 مستويات لكن في بداية السنة راح يكون في اختبار تحديد مستوى وحسب نتجيته راح تبدأ في المستوى المناسب, اذا بديت من اول مستوى راح تاخذ مستويين كل ترم وراح تاخذ من وقتك كثيير لانه 4 ساعات يومياً, اذا اجتهدت خلال هذي السنة راح تحسن لغتك وتقدر تتكلم وتكتب وتفهم بشكل كبير.
الحاسب الآلي: منهج سهل جداً شرح لاطفاء وتشغيل الجهاز وبرامج الاوفس بالتفصيل 
كل الكلام الي فوق كان في 2013 فممكن تغيرت بعض التفاصيل لكن بشكل عام راح تواجة نفس الشي.
بعد انتهاء السنة التحضيرية راح يفتح تسجيل الرغبات وتختار الكلية الي ترغبها اختار بعناية واختار الشيء الي ترغبة وتحبة والله يكتب لك الخير, طبعا لازم تحط في بالك حاجة مهمة وهي انه كل كلية لها متطلبات خاصة من درجات المواد, انا كنت راغب كلية الحاسبات وكنت عارف متطلباتها, فإعرف من الان ايش هي متطلبات الكلية الي ترغبها حتى تقدر تستوفيها خلال السنة, كلية الحاسبات كانت تتطلب درجة لاتقل عن 85 في كل من الحاسب ومواد الانجليزي.
صيف عام 2013 و ظهور نتائج رغبات الكليات
لا ازيد عن ماكتبتة هنا
كلية الحاسبات وتقنية المعلومات
درست اكثر من 30 مادة في قسم تقنية المعلومات بتكلم عن المهم منها والي راح يفرق معاك كطالب حاسب :)
مواد البرمجة: 3 مواد رئيسية ومهمة وستكون دراستك معتمدة بشكل كبير على فهمك للبرمجة, راح تسمع كلام كثير انه المادة صعبة وان الدكتور الفلاني كذا وكذا لكن لاتسمع لهذا الكلام انت دخلت كلية الحاسبات وانت تبغاها انا ما انكر بعض الصعوبات في البداية لكن مع وجود النت والمصادر تقدر تطور نفسك , الثلاث مواد بتكون على 3 اترام والمادة الثالثة (تراكيب البيانات) عبارة عن مفاهيم اكثر من انها برمجة وطبعا راح يكون مع كل مادة 4 او 5 مشاريع تنزل كل اسبوعين راح تطبق (تبرمج) مشروع معين حسب الي درستة وهي بدايتك الفعلية في البرمجة.
مادة مقدمة حوسبة: اول مادة في الكلية تتكلم عن اشياء كثيرة في الكمبيوتر اهم شيء فيها تعرف وتفهم انظمة العد الـ binary و hex و octal و خصوصاً الباينري وطريقة التحويل من والى النظام العشري هو اساس كل شي في الحاسب وراح يستمر معااك على طول الـ 4 سنوات في كلية.
مادة نظم التشغيل: مادة دسمة عبارة عن كيف يبدأ نظام التشغيل “زي الويندوز مثلا” من بداية التشغيل مرورا بتنظيم البرامج والعمليات في الذاكرة والمعالج حتى انتهائها و ايقاف تشغيل النظام, مفاهيم كثيرة بتواجهها وتتطلب بحث شخصي واجتهاد كبير منك حتى تفهمها بشكل كامل.
مادة تنظيم وبنيان الحاسب: computer architecture اعتقد بهذا المصطلح تقدر تاخذ فكرة عن المادة, راح تبدأ من اساس ظهور الدوائر الالكترونية وكيفية بنائها, و كيف تتم عمليات الحاسب على المستوى الفيزيائي يعني بالعربي قطعة المعالج الي تقدر تمسكها في يدك ايش يصير داخلها وكيف تصير العمليات الاساسية الطرح ,الجمع ,الضرب والقسمة, موضوع المادة شيق لكن وقتها واجهنا صعوبة بسبب اننا كطلاب (كُسالى) نهتم في السلايدات ولكن ماكان في سلايدات فتحتاج تتابع و تذاكر من اكثر من مصدر من النت.
مادة برمجة تطبيقية متقدمة: مادة راح تاخذها في السنة الرابعة و راح تنتقل لمستوى جديد في البرمجة وكيف تتعامل بشكل مباشر من برنامجك مع نظام التشغيل والفايلات وكيف تبني شفرة تعتمد على الـ Threads بحيث يكون برنامجك قادر على عمل اكثر من شي في وقت واحد, طبعاً من اسم المادة Advanced وهي شي صحيح متقدم لك كطالب لكن اذا تهتم بالبرمجة بتكتشف ان كل شي في هذي المادة اساسي في اغلب البرامج الموجودة في الواقع والي راح تبرمجها انت مستقبلاً, المادة ممتعة اذا كنت شغال على نفسك في البرمجة, ومتعبة اذا اخذتها كتلقين فقط بدون ما تطبق فلا تهمل هالمادة ابداً لأنها بتفيدك كمان في انشاء مشروع التخرج :)
مواد هندسة البرمجيات وتحليل النظم: مواد عبارة عن مفاهيم فقط فقط, بحاول اوضح فكرة المادة في هذي النقطة, خلال مئات السنوات الماضية الناس بتواجه مشاكل في مشاريعها اي كان نوعها واغلبها مشاكل شائعة فيجتمع الناس (منظمات وشركات) لايجاد حلول ومعايير (Standards) بحيث اذا بيتم عمل اي مشروع جديد يتّبعون هذي المعايير عشان ماتحصل لهم المشاكل الي مروا فيها الي قبل كذلك تم عمل الكثير من الاساليب (Methodologies & Approaches) والي راح تساعدك في بناء بيئة عمل مناسبة لمشروعك , هذا شرح عام جدا من تصوري الشخصي والمادة بتعلمك شي كثير في هذا المجال.
مادة اساسيات الشبكات, اساسيات قواعد البيانات: مادتين كل وحده تتكلم بشكل شبة مفصل عن موضوعها ودسمة وراح تستمتع في المعمل والتطبيق العملي افكارها كثيرة ورايعة, وراح تساعدك في تحديد مسارك.
مادة ادارة قواعد البيانات: بتكون في اخر سنة المنهج بصراحة غبي ومركز بنسبة 99,9% على الافكار النظرية بدون تطبيق مفيد حتى في المعمل.
مادة ادارة الشبكات: مادة تم عمل منهجها بشكل سليم بحيث انها تعتمد بشكل كامل على منهج شركة سيسكو للشبكات مادة فيها تطبيق عملي وتفاصيل كبيرة, تبداً من عملية تصميم الشبكات وعملية (Subnetting) مرورا باستخدام مفصل بروتوكولات الرواتنق وعمل (VLAN) وادارة السوتشات والرواترات بشكل مباشر, المادة دسمة جداً جداً فحتى عدد المحاضرات خلال الترم لايكفي لتغطية المنهج بشكل مناسب, لكن عموماً المادة من اكبر المواد في القسم ممتعة لأي شخص متخصص في مجال الشبكات.
مشروع التخرج
سيكون مقسم على مادتين على الترمين في السنة الاخيرة, الاولى متخصصة ببناء التوثيق (Documentation) والتحليل وانشاء الاستبيانات لاخذ قدر كافي من الاضافات الي ستطرأ على المشروع وبيكون التركيز على (هل المشروع سيكون حلاً لمشكلة ما) هل مشروعك بيضيف شيء و بيفيد الناس و العالم من حولك ولا لا.
القسم الثاني بيكون انت وزميلك في المشروع فقط معاكم 3 اشهر لتطبيق المشروع وبرمجتة ثم سيتم في الاخير مرحلة التقيم والحصول على الدرجة.
ابحث عن فكرة المشروع من بدري بتواجه مشكلة كبيرة في البحث عن الفكرة وممكن ترفضها اللجنة, ليش؟ في معايير لازم تكون موجودة في الفكرة
- لازم تحل مشكلة معينة او تحسن حل موجود.
- لازم مايكون المشروع بسيط جدا ولا يكون كبير جدا.
- لازم مايكون المشروع مجرد ادخال واخراج للبيانات, يعني لازم شغلك البرمجي يحتوي على تحليل للبيانات و يكون الناتج النهائي معتمد بشكل او باخر على المدخلات.
مع الوقت خلال دراستك في الجامعة بتفهم للمعاير هذي فلا تشيل همها, لكن الفكرة اطبخها من بدري :)
الترم الصيفي والدورات
نصيحة لا تفوت الترم الصيفي استغلة بتنزيل 3 مواد بتريحك كثير ودراسة الصيفي رائعة والله, منهج 4 شهور تخلصة في شهرين , محاضرة 50 دقيقة تخلصها في نص ساعة, شوارع ومواقف فاضية, وفي النهاية تقدر تتخرج بدري :)
الدورات التدريبة في الجامعة وخارجها حاول تستغل وقت قدر ماتقدر لانها بتفيدك وقت بعد التخرج, كليتنا نظمت دورات عملية على مدى 3 سنوات والان اقدر اسجلها في السيرة الذاتية.
خاتمة
الله يوفقكم جيميعاً ويكتب لكم الخير , سبحان الله وبحمدة سبحان الله العظيم